Onzè diswa, li pral minui.
Se lè pou m’ ta f’on ti dòmi
Men ka vwazen an gen yon bri
Ki fè zye mwen rete louvri.
M’eseye pa okipe sa,
Fè komsi mwen pa tande sa,
Komsi bri m tande a pa sa.
Men sa gaye nan katye a.
Onzè diswa, li pral minui.
Se lè pou m’ ta f’on ti dòmi
Men ka vwazen an gen yon bri
Ki fè zye mwen rete louvri
M’blije al f’on ti te fèy.
Madanm, timoun nan fon somèy.
Chans yo: yo pap tande lòbèy.
Rèl sa yo se rigwaz zorèy.
Onzè diswa, li pral minui.
Se lè pou m’ ta f’on ti dòmi
Men ka vwazen an gen yon bri
Ki fè zye mwen rete louvri
Mwen pate fè pwojè bat nay
Demen bonè, fò m’ al travay.
Men mwen blije ap pase tray:
CHAT VWAZEN AN AP FÈ BAGAY !